• gimbecej@gmail.com
• 021/6913-165
• gimnazijabecej.edu.rs

Рок снованя: 1925

Снователь: Автономна Покраїна Войводина

Файта установи: Gimnazija

Язик воспитно-образовней роботи: Сербски, Мадярски

О установи

Одлуку о вибудови будинку Ґимназиї Бечей принєсол Општински одбор на схадзки 15. мая 1923. року.
Будинок вибудовани з предаваньом општинского маєтку, 106 гольтох жеми, на основи проєкту бечейского архитекти Ґиндер Йожефа.
Ґимназия у Бечею основана 27. октобра 1925. року кед Министерство просвити зоз своїм ришеньом дало дозволу за роботу.
Бечейска Ґимназия почала з роботу 2. новембра 1925. року, после того як школяре и наставнїки були у Церкви на дзекованю, а после прешли до нового будинку у хторим окончене єй пошвецанє.
До новооснованей Ґимназиї першого року уписани 350 школяре хтори були розпоредзени do 12 оддзелєньох и то:
штири оддзелєня першей, по три оддзелєня другей и трецей и два оддзелєня штвартей класи.
За директора поставени Никола Зорич, професор историї и ґеоґрафиї.
Державна реална ґимназия у Бечею, як ше волала до окупациї 1941. року, перше була штирокласова, же би єй зоз ришеньом Министерства просвити у новембру 1927. року було одобрене отверанє пиятей и шестей класи.
Шлїдуюцого школского 1928/1929. року достала дозволу отвориц и седму класу, алє у шлїдуюцих штирох рокох, пре економски кризи у жеми и у швеце, а и мале число уписаних школярох, нє було средства за отверанє и отримованє висших класох, та школа и далєй остала нєподполна.
Конєчно 1933/1934. школского року бечейска ґимназия поступно преросла до осемкласовей подполней ґимназиї.
Под успишним руководством Зорича и фахового наставного кадру вона ше барз швидко розвивала.
З помоцу општини и гражданох донаторох у нєй ше находза збирки наставних средтсвох за оглядну наставу, школярска и наставнїцка библотека и обезпечую инши потреби за нормалну роботу.
Уж концом трицетих рокох, а поготов у децениї пред другу шветову войну у нєй, попри порядней настави, постоя орґанизовани звонканаставни активносци, школярски орґанизациї фериялцох, Червеного крижа, Аеро-клубу и подобне, а у нєй постої и школярски хор и оркестер.
Ґимназия уж теди за свой штредок постала розсаднїк просвити и култури.
У нєй було школярох зоз шицких околних местох.
Школяре Ґимназиї у Бечею свойо здобути знаня преношели до своїх фамелийох и штредкох зоз хторих походза.
Под час окупациї Ґимназия предлужує з роботу на маярским язику.
Под час войни вецей як 150 єй школяре ше находзели у шорох борцох процив фашизму, а 53-ойо положели живот на олтар шлєбоди свойому отечеству.
Так перши ґенерациї младих хтори здобули дозретосц у тей бечейскей штреднєй школи постали и єй траґична младосц.
После ошлєбодзеня Ґимназия у Бечею предлужела з роботу 15. януара 1945. року.
Достала нову назву:
«Подполно мишана Ґимазия Бечей».
Од єшенї 1945. року основани, окрем на сербским язику и нїзши оддзелєня з наставу на мадярским язику.
Року 1963. у бечейскей Ґимназиї ше отвара и висши оддзелєня з наставу на мадярским язику.
У нєй ше школую попри школярох з Бечею и млади зоз шицких околних местох, та и з дальших валалох у Войводини.
Тих рокох наставнїцки кадер под руководством искусного педаґоґа и доброго орґанизатора, професора Чедомира Потпарича, директора школи, до процесу образованя и воспитаня уноши нови и сучасни методи.
Шицко тото допринєсло же би Ґимназия у Бечею посцигла замерковани успихи и резултати и же би ше учишлєла медзи найвизначнєйши школи у Войводини.
Тото допринєсло же би Завод за унапредзенє школства Войводини 1956. року вибрал, як ше теди волала, Ґимназию «Тодор Дукин» же би була експерименталана, т.є. школа у хторей ше будзе окончовац преверйованє одредзених иновацийох у образованю и воспитаню младих, скорей як то постанє обща пракса.
З вельку озбильносцу и ентузиязмом и наставнїки и школяре прилапели кабинетску наставу, семинарски роботи, виборну наставу и рекреацию у предмету физичного воспитаня, наставу ґеоґрафиї на нємецким язику и шицко друге цо доприношело осучасньованю наставно-воспитного процесу.
З експерименталну роботу Ґимназиї Бечей упознати и УНЕСКО, чия делеґация вецей раз нащивела школу.
На чоло Ґимназиї 1959. року ступа професор Василиє Калезич, а 1962. року його успишну роботу предлужує Урош Васин, професор литератури.
У периоду своєй експерименталней роботи Ґимназия достала даскельо значни припознаня и то:
Награду «8. октобер» општини Бечей 1968. року, першу награду у акциї «Рок квалитету» у штреднїх школох Войводини 1974. року, Златну плакету Союзу физичней култури Войводини за успишну активносц у физичней култури у периоду од 1945- 1975. року, Вельку плакету Червеного крижа Войводини 1976. року, «Ґорански щит» за винїмкове доприношенє розвою и унапредзеню животного штредку, истого року достава и Орден зоз стрибернима зарями за окремни заслуги у образованю и воспитаню младих и за доприношенє ширеню просвити и култури.
Року 1976. з намаганями Општини и велїх других подприємствох донаторох, як и з одреканьом наставнїцкого колективу опремени школски кабинети и збирки з мебльом и наставнима средствами, а школярска и наставнїцка библиотека пополнєна з новима кнїжками хторих теди було 16.000 прикладнїки.
Ґимназия того року преглашена за другу школу у Войводини по ступню опременосци зоз сучаснима наставнима и другима средствами за отримованє настави.
Року 1977. приходзи до Шуваровей реформи школства кед Ґимназия у Бечею подзелєна на перши два класи такволаних заєднїцких основох и остатнї два класи унапряменого образованя.
Дворочна школа унапряменого образованя, гоч затримала окремне мено Ґимназиї достала и назву:
Центер за позитивно-унапрямене образованє у дружтвених дїялносцох «Тодор Дукин» Бечей.
Виселєна є зоз свойого будинку и змесцена у будинку бувшей Економскей школи.
Року 1983. тота дворочна унапрямена школа интеґрована з Економским школским центром и утаргнута є.
Правда у тей ознова штирочней школи хтора ношела мено Штредня школа «Влада Провчи», остало як нашенє оддзелєнє природно-математичного фаху зоз хторого 1990. року настала терашня Ґимназия.
Вона врацена до свойого будинку и предлужела роботу под рукуводством директора Йована Белошева.
У нєй ше под час вецей як 95 рокох постояня школовали вецей як 10.000 школяре.
Вони ше нєшка находза на роботних местох ширцом нашей жеми, а у Бечею нєт подприємства, установи або вообще роботней орґанизациї, же би у нєй нє робели єй бувши школяре.
Велї з нїх су постали науковци, уметнїки, писателє, дипломати, професоре, лїкаре, правнїки и други високообразовани фаховци и руководителє.
Медзи нїма ше находза вецей як 60 докторе наукох и векше бчисло професорох на факултетох южнославянских универзитетох.
После успишного водзеня школи и одходу до пензиї тедишнєй директорки Милани Ґожански 2006. року, професорски кадер на чолу з директором мр Миодраґом Басаричом хтори зоз свою роботу, закладаньом и посцигнутима резултатами, оправдує високи угляд хтори Ґимназия у Бечею здобула.
Високи уровень посцигнуца Ґимназиї препознати од Министерства просвити, науки и технолоґийного розвою кед школа после вонкашнього вреднованя оценєна з найвисшу оцену.
Тиж у тим периоду Ґимназия у Бечею наградзена з Вельку златну медалю за квалитет на Медзинародним сайму образованя у Новим Садзе и Рочну награду општини Бечей.
Од школского 2021/22. року до Ґимназиї, коло общого напряму на мадярским наставним язику, дружтвено-язичного и природно-математичного напряму на сербским наставним язику, уписана и перша ґенерация школярох з окремнима способносцами за спорт.

Директор: в.д. Страхиња Гаврић

Датум ступаня на длужносц: 28.08.2025